ਸਾਗੂ ਡਰੀਮਜ਼ ਵੱਲੋਂ ਅਵਤਾਰ ਰੰਧਾਵਾ ਦੀ ਸੀ.ਡੀ. “ਬਿੱਲੋ” ਆਸਟ੍ਰੇਲੀਆ ‘ਚ ਰਿਲੀਜ਼ ਕੀਤੀ ਗਈ........ ਸੀ. ਡੀ. ਰਿਲੀਜ਼ / ਸ਼ਬਦ ਸਾਂਝ ਬਿਊਰੋ

ਮੈਲਬੌਰਨ (ਸ਼ਬਦ ਸਾਂਝ ਬਿਊਰੋ) ਸਾਗੂ ਡਰੀਮਜ਼ ਮਿਊਜਿ਼ਕ ਕੰਪਨੀ ਵੱਲੋਂ ਮੈਲਬੌਰਨ ਦੇ ਦਿੱਲੀ ਰੌਕਸ ਰੈਸਟੋਰੈਂਟ ਵਿਖੇ ਇਟਲੀ ਦੇ ਗਾਇਕ ਅਵਤਾਰ ਰੰਧਾਵਾ ਦੀ ਪਹਿਲੀ ਸੀ.ਡੀ. “ਬਿੱਲੋ” ਮਾਣਯੋਗ ਜੂਡ ਪਰੇਰਾ ਐਮ.ਪੀ. ਵੱਲੋਂ ਤਸਵਿੰਦਰ ਸਿੰਘ, ਬਲਜਿੰਦਰ ਸਿੰਘ ਤੇ ਅਨੂਪ ਸ਼ਰਮਾ ਦੇ ਸਹਿਯੋਗ ਨਾਲ਼ ਰਿਲੀਜ਼ ਕੀਤੀ ਗਈ । ਇਸ ਮੌਕੇ ‘ਤੇ ਹੋਰਨਾਂ ਤੋਂ ਇਲਾਵਾ ਮਨਜੀਤ ਸਿੰਘ ਔਜਲਾ, ਵਜਿ਼ੰਦਰ ਸ਼ਰਮਾ, ਡੀ. ਜੇ. ਸੈਂਡੀ, ਆਸਟ੍ਰੇਲੀਅਨ ਤੇ ਭਾਰਤੀ ਮੀਡੀਆ ਦੇ ਨੁਮਾਇੰਦੇ ਹਾਜ਼ਰ ਸਨ । ਇਸ ਸੀ.ਡੀ. ਦੇ ਗੀਤਕਾਰ ਹਰਵਿੰਦਰ ਉਹੜਪੁਰੀ ਤੇ ਸੰਗੀਤ ਅਸ਼ੋਕ ਸ਼ਰਮਾ ਦਾ ਹੈ । ਸਾਗੂ ਡਰੀਮਜ਼ ਦੇ ਮੈਨੇਜਿੰਗ ਡਾਇਰੈਕਟਰ ਯੁੱਧਵੀਰ ਸਿੰਘ ਨੇ ਪਹੁੰਚੇ ਹੋਏ ਮਹਿਮਾਨਾਂ ਦਾ ਸਵਾਗਤ ਕਰਦਿਆਂ ਦੱਸਿਆ ਕਿ ਸਾਗੂ ਡਰੀਮਜ਼ ਦੀਆਂ ਭਵਿੱਖ ਦੀਆਂ ਯੋਜਨਾਵਾਂ ‘ਚ ਆਸਟ੍ਰੇਲੀਆ ਵਿਖੇ ਹੀ ਗੀਤਾਂ ਦੀ ਰਿਕਾਰਡਿੰਗ ਕਰਨਾ ਸ਼ਾਮਿਲ ਹੈ ।


ਜਿੰਮ –1 ਅਤੇ ਜਿੰਮ –2 ਤੋਂ ਬਾਅਦ ਹਾਜ਼ਰ ਹੋਇਆ ਹੈ ਗਾਇਕ ਜਤਿੰਦਰ ਗਿੱਲ.......... ਕੈਸਿਟ ਰਿਲੀਜ਼ / ਜਸਬੀਰ ਜੱਸੀ (ਫਰੀਦਕੋਟ)


ਪੰਜਾਬੀ ਗਾਇਕੀ ’ਚ ਉਂਗਲੇ ਤੇ ਗਿਣੇ ਜਾਣ ਵਾਲੇ ਸੁਰੀਲੇ ਗਾਇਕਾਂ ’ਚ ਜਤਿੰਦਰ ਗਿੱਲ ਨੇ ਆਪਣੀ ਨਿਰੰਤਰ ਮਿਹਨਤ ਨਾਲ ਨਾਮ ਦਰਜ ਕੀਤਾ ਹੈ। ਲੋਕ ਗਥਾਵਾਂ ਨੂੰ ਤਾਜ਼ਗੀ ਦਾ ਅਹਿਸਾਸ ਦੇ ਕੇ ਗਾਉਣ ਵਾਲੇ ਜਤਿੰਦਰ ਗਿੱਲ ਨੇ ‘ ਤੇਰੇ ਦਰਸ਼ਨ ਦੁੱਧ ਵਰਗੇ ’ ਕੈਸਿਟ ਨਾਲ ਕੁਝ ਵਰ੍ਹੇ ਪਹਿਲਾਂ ਪੰਜਾਬੀ ਗਾਇਕੀ ਦੇ ਵਿਹੜੇ ਪੈਰ ਧਰਿਆ ਤੇ ਫ਼ਿਰ ‘ ਮਿੱਤਰਾਂ ਦੀ ਗੱਲ ਵੱਖਰੀ ’ ਕੈਸਿਟ ਨਾਲ ਗਾਇਕ ਵਜੋਂ ਆਪਣੀ ਪਹਿਚਾਣ ਗੂੜ੍ਹੀ ਕੀਤੀ। ਜਤਿੰਦਰ ਡੇਹਲੋਂ ਤੋਂ ਜਤਿੰਦਰ ਗਿੱਲ ਬਣ ਕੇ ਉਸ ਨੇ ਜਿੰਮ-1 ਅਤੇ ਜਿੰਮ -2 ਕੈਸਿਟਾਂ ਨਾਲ ਸੋਲੋ ਅਤੇ ਦੋਗਾਣਾ ਗਾਇਕੀ ਨਾਲ ਇਨਸਾਫ਼ ਕਰਦਿਆਂ ਸਾਬਤ ਕਰ ਦਿੱਤਾ ਸੀ ਜੇਕਰ ਸੰਗੀਤ ਦੀ ਸੂਝ ਹੋਵੇ ਤਾਂ ਵਿਧਾ ਕੋਈ ਵੀ ਹੋਵੇ ਜਿੱਥੇ ਗਾਉਣ ਦਾ ਆਪ ਨੂੰ ਆਨੰਦ ਆਉਂਦਾ ਹੈ ਉੱਥੇ ਸਰੋਤੇ ਵੀ ਗਾਇਕੀ ਨੂੰ ਸੁਨਣ ਦੀ ਮਾਣਦੇ ਹਨ। ਜਤਿੰਦਰ ਗਿੱਲ ਦੀ ਖਾਸੀਅਤ ਇਹ ਹੈ ਕਿ ਉਹ ਅਜੋਕੇ ਗਾਇਕਾਂ ਵਾਂਗ ਸਿਰਫ਼ ਕੈਸਿਟ ’ਚ ਹੀ ਵਧੀਆ ਨਹੀਂ ਗਾਉਂਦਾ ਸਗੋਂ ਸਟੇਜ ਤੇ ਉਸ ਦੀ ਪੇਸ਼ਕਾਰੀ ਹਮੇਸ਼ਾ ਕਾਬਲੇ ਤਾਰੀਫ਼ ਹੁੰਦੀ ਹੈ। ਹਰ ਵਰਗ ਦੇ ਸਰੋਤੇ ਨੂੰ ਕਿਸ ਤਰ੍ਹਾਂ ਖੁਸ਼ ਜਾ ਸੰਤੁਸ਼ਟ ਕਰਨਾ ਹੈ ਇਹ ਨਵੇਂ ਗਾਇਕਾਂ ਨੂੰ ਜਤਿੰਦਰ ਗਿੱਲ ਤੋਂ ਸਿੱਖਣਾ ਚਾਹੀਦਾ ਹੈ। ਪੰਜਾਬ ਦੇ ਪ੍ਰਸਿੱਧ ਲੋਕ ਗਾਇਕ ਹਰਿੰਦਰ ਸੰਧੂ ਦੇ ਸਵ: ਪਿਤਾ ਮਾਸਟਰ ਪ੍ਰੀਤਮ ਸਿੰਘ ਯਾਦਗਰੀ ਮੇਲੇ ਤੇ ਪਹਿਲੀ ਵਾਰ ਉਸ ਨੂੰ ਸਟੇਜ ਤੇ ਵੇਖਿਆ , ਉਸ ਨੇ ਐਸਾ ਰੰਗ ਬੰਨਿ•ਆ ਕਿ ਸਰੋਤੇ ਅਸ਼ ਅਸ਼ ਕਰ ਉੱਠੇ। ਕਰੀਬ ਇੱਕ ਘੰਟਾ ਸਰੋਤੇ ਉਸ ਨੂੰ ਫ਼ਰਮਾਇਸ਼ਾਂ ਕਰਦੇ ਰਹੇ ਤੇ ਉਸ ਨੇ ਖਿੜੇ ਮੱਥੇ ਹਰ ਵਰਗ ਦੇ ਸਰੋਤੇ ਨੂੰ ਆਨੰਦ ਦੀ ਸਥਿਤੀ ’ਚ ਪਹੁੰਚਾ ਕੇ ਸਾਹ ਲਿਆ। ਸੋਲੋ ਗਾਇਕੀ ਵਿਚ ਮਾਹੀਆ, ਜੁਗਨੀ, ਜੱਗਾ ਸਿੰਘ, ਛੱਲਾ, ਮਿਰਜ਼ਾ ਅਤੇ ਮਿੱਟੀ ਦਾ ਬਾਵਾ ਦੀ ਪੇਸ਼ਕਾਰੀ ਕਰਕੇ ਉਹ ਅਕਸਰ ਆਪਣੀ ਕਲਾ ਦਾ ਲੋਹਾ ਮੰਨਵਾਉਂਦਾ ਹੈ। ਦੋਗਾਣਾ ਗਾਇਕੀ ’ਚ ਮਾਵੇ ਹੁੰਦੇ ਬੇ ਸਮਝੇ ਛਾਵਾਂ ਬੋਹੜ ਦੀਆਂ, ਐਵੇਂ ਗੁੱਸੇ ਹੋਣ ਦਾ ਬਹਾਨਾ ਫ਼ਿਰੇ ਲੱਭਦੀ, ਇੱਕ ਟੈਮ ਐਨੀਆਂ ਨਾਲ ਕਿਵੇਂ ਗੱਲ ਕਰਦੈ, ਕਰ ਲਿਆ ਜਿੰਮ ਜੁਆਇੰਨ ਸਮੇਤ ਕਈ ਗੀਤਾਂ ਨੂੰ ਬਾਖੂਬੀ ਨਿਭਾ ਕੇ ਉਹ ਹਰ ਪੇਸ਼ਕਾਰੀ ਤੋਂ ਬਾਅਦ ਆਪਣੀ ਪਹਿਚਾਣ ਦਾ ਘੇਰਾ ਵੱਡਾ ਕਰ ਲੈਂਦਾ ਹੈ। ਲੁਧਿਆਣੇ ਜ਼ਿਲੇ ਕਸਬੇ ਡੇਹਲੋਂ ਵਿਚ ਸਵਰਗੀ ਜਸਵੰਤ ਸਿੰਘ ਗਿੱਲ ਦੇ ਘਰ ਸ਼੍ਰੀਮਤੀ ਅਮਰਜੀਤ ਕੌਰ ਦੀ ਕੁੱਖ ਨੂੰ ਭਾਗ ਲਾਉਣ ਵਾਲਾ ਜਤਿੰਦਰ ਗਿੱਲ ਐਮ.ਐਸ. ਸੀ ਬਾਟਨੀ ਹੈ। ਜਗਦੇਵ ਸਿੰਘ ਜੱਸੋਵਾਲ ਦੀ ਅਗਵਾਈ ਵਿਚ ਪ੍ਰੋ. ਮੋਹਨ ਸਿੰਘ ਦੇ ਮੇਲੇ ਤੇ ਲੁਧਿਆਣੇ ਤੋਂ ਸ਼ੁਰੂਆਤ ਕਰਕੇ ਅੱਜ ਦੇਸ਼ ਦੇ ਹਰ ਕੋਨੇ ਵਿਚ ਆਪਣੀ ਗਾਇਕੀ ਦੇ ਜਲਵੇ ਬਿਖੇਰ ਰਿਹਾ ਹੈ। 
ਅੱਜਕੱਲ• ਜਤਿੰਦਰ ਗਿੱਲ ਨਵੀਂ ਕੈਸਿਟ ਜਤਿੰਦਰ ਗਿੱਲ ਲਾਈਵ ‘ਜ਼ਿੰਦਗੀ ਦੇ ਰਾਹਾਂ ਵਿਚ ’ ਨਾਲ ਸੰਗੀਤ ਪ੍ਰੇਮੀਆਂ ਦਾ ਧਿਆਨ ਪੂਰੀ ਤਰ੍ਹਾਂ ਆਪਣੇ ਵੱਲ ਖਿੱਚ ਰਿਹਾ ਹੈ। ਐਸ.ਐਮ.ਆਈ. ਕੰਪਨੀ ਦੇ ਨਿਰਮਾਤਾ ਸੱਜਣ ਦੂਹਣ ਵੱਲਂ ਮਾਰਕੀਟ ’ਚ ਭੇਜੀ ਜਤਿੰਦਰ ਲਾਈਵ ਬਾਰੇ ਪੁੱਛਣ ਤੇ ਉਸ ਨੇ ਦੱਸਿਆ ਕਿ ਜੱਸਾ ਫ਼ਤਿਹਪੁਰੀਆ ਦੀ ਪੇਸਕਸ਼ ਇਸ ਕੈਸਿਟ ਦੇ ਗੀਤਾਂ ਨੂੰ ਅਨਿਲ ਫ਼ਤਿਹਪਰ ਜੱਟਾਂ, ਪ੍ਰੀਤ ਸੰਘਰੇੜੀ, ਹਰਜੀਤ ਮਾਂਗਟ, ਸੋਨਾ ਡੇਹਲੋਂ, ਤੇ ਜਤਿੰਦਰ ਨੇ ਖੁਦ ਲਿਖਿਆ ਹੈ। ਕੈਸਿਟ ਦਾ ਸੰਗੀਤ ਵਿਨੈ -ਕਮਲ ਦੀ ਜੋੜੀ ਨੇ ਬਾਖੂਬੀ ਤਿਆਰ ਕੀਤਾ ਹੈ। ਸ਼ੇਅਰੋ ਸ਼ਾਇਰੀ ਅਤੇ ਗੀਤਾਂ ਨਾਲ ਸਜੀ ਇਸ ਕੈਸਿਟ ‘ਚ ਕਬੱਡੀ ਸੰਸਾਰ ਕੱਪ ਜਿੱਤਣ ਵਾਲੇ ਖਿਡਾਰੀਆਂ ਵਾਸਤੇ ਤੋਹਫ਼ੇ ਦੇ ਰੂਪ ’ਚ ਪੇਸ਼ ਕੀਤਾ ਗੀਤ ਲੋਕਾਂ ਦੀ ਪਸੰਦ ਬਣਿਆ ਹੈ। ਕੈਸਿਟ ਦੇ ਸਮੁੱਚੇ ਗੀਤਾਂ ਨੂੰ ਹਰ ਵਰਗ ਦੇ ਸਰੋਤੇ ਵੱਡੇ ਪੱਧਰ ਤੇ ਹੁੰਗਾਰਾ ਮਿਲ ਰਿਹੈ ਹੈ। ਉਨ੍ਹਾਂ ਦੱਸਿਆ ਕਿ ਜਤਿੰਦਰ ਲਾਈਵ ਨੂੰ ਸਰੋਤਿਆਂ ਤੱਕ ਪੁਹੰਚਾਉਣ ਵਾਸਤੇ ਕਿੱਟੂ ਜ਼ੇਲਦਾਰ ਤੇ ਰਜਿਤ ਨੇ ਵਿਸ਼ੇਸ਼ ਸਹਿਯੋਗ ਦਿੱਤਾ ਹੈ। ਜਤਿੰਦਰ ਗਿੱਲ ਦੀ ਇਸ ਕੈਸਿਟ ਨੂੰ ਪੂਰੀ ਤਰ੍ਹਾਂ ਸੁਨਣ ਤੇ ਪਰਖਣ ਤੋਂ ਬਾਅਦ ਇਹੀ ਕਿਹਾ ਜਾ ਸਕਦਾ ਹੈ ਕਿ ਜਤਿੰਦਰ ਲਾਈਵ ਸੰਗੀਤ ਪ੍ਰੇਮੀਆਂ ਵਾਸਤੇ ਸੱਚਮੁੱਚ ਸੰਗੀਤਕ ਤੋਹਫ਼ਾ ਹੈ। ਪ੍ਰਮਾਤਮਾ ਅੱਗੇ ਮੇਰੀ ਇਹੀ ਦੁਆ ਹੈ ਕਿ ਇਹ ਸੁਰੀਲਾ ਗਾਇਕ ਇਸੇ ਤਰ੍ਹਾਂ ਪੰਜਾਬੀ ਸੰਗੀਤ ਨੂੰ ਹੋਰ ਪ੍ਰਫ਼ੁੱਲਤ ਕਰਨ ਵਾਸਤੇ ਯਤਨ ਕਰਦਾ ਰਹੇ। 

ਬਾਤਾਂ ਬੀਤੇ ਦੀਆਂ ਰੀਲੀਜ਼ ਸਮਾਰੋਹ .......... ਪੁਸਤਕ ਰਿਲੀਜ਼ / ਲਖਵਿੰਦਰ ਸਿੰਘ ਮਾਨ

ਪੰਜਾਬੀ ਸਭਿਆਚਾਰ ਦੀ ਸਰਬਪੱਖੀ ਉਨਤੀ ਲਈ ਯਤਨਸ਼ੀਲ, ਪੰਜਾਬੀ ਸੱਥ ਲਾਂਬੜਾ ਵੱਲੋਂ, ਆਸਟ੍ਰੇਲੀਆ ਵਾਸੀ, ਪਰਵਾਸੀ ਲੇਖਕ ਗਿਆਨੀ ਸੰਤੋਖ ਸਿੰਘ ਜੀ ਦੀ ਪੁਸਤਕ, ‘ਬਾਤਾਂ ਬੀਤੇ ਦੀਆਂ’ ਸੰਤ ਬਾਬਾ ਬਲਬੀਰ ਸਿੰਘ ਸੀਂਚੇ ਵਾਲ ਜੀ ਦੇ, ਪਵਿਤਰ ਹਥਾਂ ਦੁਆਰਾ ਰੀਲ਼ੀਜ਼ ਕਰਵਾਈ ਗਈ।
ਸੱਥ ਵੱਲੋਂ ਆਪਣੀ ਵੀਹਵੀਂ ਪਰ੍ਹਿਆ ਦੇ ਸਮਾਗਮ ਵਿਚ ਜਿਥੇ ਕੁਝ ਹੋਰ ਸਮਾਜ ਸੇਵੀ ਸ਼ਖ਼ਸੀਅਤਾਂ ਨੂੰ ਸਨਮਾਨਤ ਕੀਤਾ ਗਿਆ ਓਥੇ ਗਿਆਨੀ ਜੀ ਦੀ ਕਿਤਾਬ ‘ਬਾਤਾਂ ਬੀਤੇ ਦੀਆਂ’ ਨੂੰ ਵੀ ਪਾਠਕਾਂ ਨੂੰ ਸਮੱਰਪਤ ਕੀਤਾ ਗਿਆ। ਉਸ ਸਮੇ ਸਟੇਜ ਉਪਰ ਸਤਿਕਾਰਤ ਮਹਾਨ ਸ਼ਖ਼ਸੀਅਤਾਂ ਵੱਲੋਂ ਗਿਆਨੀ ਜੀ ਦੇ ਇਸ ਉਦਮ ਦੀ ਭਰਪੂਰ ਸ਼ਲਾਘਾ ਕੀਤੀ ਗਈ।

ਸੰਸਾਰ ਵਿਚ ਵੱਸ ਰਿਹਾ ਪੰਜਾਬੀ ਭਾਈਚਾਰਾ ਗਿਆਨੀ ਜੀ ਦੀ ਵਿਦਵਤਾ, ਜੋ ਕਿ ਉਹਨਾਂ ਦੇ ਭਾਸ਼ਨਾਂ ਅਤੇ ਲਿਖਤ ਦੁਆਰਾ ਪਰਗਟ ਹੁੰਦੀ ਹੈ, ਤੋਂ ਜਾਣੂ ਹੈ। ਆਪ ਜੀ ਪਹਿਲਾਂ ਪੰਜਾਬ ਵਿਚ ਤੇ ਫਿਰ ਪਿਛਲੇ 37 ਸਾਲਾਂ ਤੋਂ ਪਰਦੇਸਾਂ ਵਿਚ ਭਰਮਣ ਕਰਕੇ, ਪੰਜਾਬੀ ਭਾਈਚਾਰੇ ਵਿਚ ਵਿਚਰਦੇ ਆ ਰਹੇ ਹਨ। 31 ਸਾਲਾਂ ਤੋਂ ਪਰਵਾਰ ਸਮੇਤ ਪੱਕਾ ਟਿਕਾਣਾ ਆਸਟ੍ਰੇਲੀਆ ਦੇ ਸ਼ਹਿਰ ਸਿਡਨੀ ਵਿਚ ਹੈ ਪਰ ਸੰਸਾਰ ਦੀਆਂ ਯਾਤਰਾਵਾਂ ਦਾ ਸਿਲਸਿਲਾ ਲਗਾਤਾਰ ਅਜੇ ਵੀ ਜਾਰੀ ਹੈ।
ਗਿਆਨੀ ਜੀ ਦੀ ਸਭ ਤੋਂ ਸਭ ਪਹਿਲੀ ਪੁਸਤਕ ‘ਸਚੇ ਦਾ ਸਚਾ ਢੋਆ’ ਗੁਰੂ ਸਾਹਿਬਾਨ ਨਾਲ ਸਬੰਧਤ ਇਤਿਹਾਸ ਦਾ ਵਰਨਣ ਕਰਦੀ ਹੈ। ਪਾਠਕਾਂ ਨੇ ਇਸ ਨੂੰ ਏਨਾ ਪਸੰਦ ਕੀਤਾ ਕਿ ਥੋਹੜੇ ਹੀ ਸਮੇ ਵਿਚ ਇਸ ਦੇ ਤਿੰਨ ਐਡੀਸ਼ਨ ਛਪ ਕੇ ਪਾਠਕਾਂ ਦੇ ਹੱਥਾਂ ਵਿਚ ਪਹੁੰਚ ਚੁੱਕੇ ਹਨ। ਦੂਜੀਆਂ ਦੋਹਾਂ ਕਿਤਾਬਾਂ ਵਿਚ ਗਿਆਨੀ ਜੀ ਦੀਆਂ ਯਾਤਰਾਵਾਂ ਦਾ ਵਰਨਣ ਹੈ ਤੇ ਇਸ ਚੌਥੀ ਕਿਤਾਬ ਵਿਚ, 1947 ਤੋਂ ਲੈ ਕੇ ਹੁਣ ਤੱਕ, ਆਪਣੀਆਂ ਅੱਖਾਂ ਸਾਹਮਣੇ ਵਾਪਰ ਰਹੀਆਂ ਘਟਨਾਵਾਂ, ਜੋ ਕਿ ਪੰਥ, ਪੰਜਾਬ, ਸਿੱਖੀ, ਅਕਾਲੀ ਇਤਿਹਾਸ ਦਾ, ਪ੍ਰਤੱਖ, ਹੱਡੀਂ ਵਾਪਰਿਆ ਤੇ ਅੱਖੀਂ ਵੇਖਿਆ ਬਿਆਨ ਹੈ। ਪੰਜਾਬੀ ਪਾਠਕਾਂ ਵਾਸਤੇ ਇਹ ਇਕ ਹਵਾਲਾ ਪੁਸਤਕ ਵਜੋਂ ਪਰਗਟ ਹੋਈ ਹੈ। ਇਤਿਹਾਸ, ਧਰਮ, ਰਾਜਨੀਤੀ, ਸਾਹਿਤ, ਪੱਤਰਕਾਰੀ, ਯਾਤਰਾ ਵਿਚ ਦਿਲਚਸਪੀ ਰੱਖਣ ਵਾਲ਼ੇ ਪਾਠਕਾਂ ਵਾਸਤੇ ਤਾਂ ਇਹ ਇਕ ਗਾਈਡ ਸਮਾਨ ਹੈ।
ਗਿਆਨੀ ਜੀ ਦਾ ਇਹ ਵੱਡਪਣ ਹੀ ਹੈ ਕਿ ਏਨੇ ਚਿਰ ਤੋਂ ਵਿਦੇਸ਼ ਵਿਚ ਵੱਸੇ ਹੋਣ ਦੇ ਜਾਵਜੂਦ ਆਪਣੀ ਜ਼ਮੀਨ, ਆਪਣੀ ਮਾਂ ਬੋਲੀ ਨੂੰ ਭੁੱਲੇ ਨਹੀ ਸਗੋਂ ਇਸ ਵਿਚ ਹੋਰ ਨਿਖਾਰ ਲਿਆਉਣ ਲਈ ਆਪਣੀ ਕਲਮ ਨੂੰ ਨਿਰੰਤਰ ਵਰਤ ਰਹੇ ਹਨ; ਭਾਵੇਂ ਕਿ ਇਹਨਾਂ ਨੇ ਲਿਖਣ ਦਾ ਕਾਰਜ ਪਿਛਲੀ ਉਮਰ ਵਿਚ ਹੀ ਸ਼ੁਰੂ ਕੀਤਾ ਹੈ। ਯਾਦ ਰਹੇ ਕਿ ਗਿਆਨੀ ਜੀ ਦੀ ਪਹਿਲੀ ਪੁਸਤਕ ‘ਸਚੇ ਦਾ ਸਚਾ ਢੋਆ’ ਨਵੰਬਰ, 2006 ਵਿਚ ਪ੍ਰਕਾਸ਼ਤ ਹੋ ਕੇ ਪਾਠਕਾਂ ਦੇ ਹੱਥਾਂ ਵਿਚ ਪਹੁੰਚੀ ਸੀ ਜਿਸ ਦੀਆਂ ਤਿਨ ਐਡੀਸ਼ਨਾਂ ਛਪ ਕੇ ਪਾਠਕਾਂ ਦੇ ਹੱਥਾਂ ਵਿਚ ਜਾ ਚੁੱਕੀਆਂ ਹਨ।
ਸਾਹਿਤਕਾਰਾਂ, ਬੁਧੀਜੀਵੀਆਂ, ਧਾਰਮਿਕ ਹਸਤੀਆਂ, ਸਮਾਜ ਸੇਵਕਾਂ, ਵਿੱਦਵਾਨਾਂ, ਵਿੱਦਿਆ ਦੇ ਦਾਨੀਆਂ, ਵਿੱਦਿਅਕ ਅਦਾਰਿਆਂ ਦੇ ਪ੍ਰਬੰਧਕਾਂ ਆਦਿ ਨੇ, ਜੋ ਦੇਸ ਅਤੇ ਵਿਦੇਸ਼ਾਂ ਤੋਂ ਆਏ ਹੋਏ ਸਨ, ਇਸ ਸਮਾਗਮ ਦੀ ਗਹਿਮਾ ਗਹਿਮੀ ਵਿਚ ਭਰਪੂਰ ਹਿੱਸਾ ਪਾ ਕੇ, ਇਸ ਨੂੰ ਇਕ ਯਾਦਗਾਰੀ ਸਮਾਗਮ ਬਣਾ ਦਿਤਾ।